АлЭС және ЕҚДБ: энергетика болашағы үшін серіктестік
«АлЭС» АҚ ЕҚДБ-мен бірлесіп «2-ЖЭО-ны жаңғырту: Қазақстанның энергетика секторында жаңа дағдыларды дамытуға және гендерлік теңдікті ілгерілетуге жәрдемдесу» жобасын іске асыруға кірісті. Халықаралық бастама компанияның адами капиталын дамытуға, қызметкерлердің кәсіби құзыреттерін арттыруға және энергетика саласын жаңғырту жағдайында кадрларды даярлаудың заманауи жүйесін қалыптастыруға бағытталған.
Жоба Ernst & Young (EY) халықаралық компаниясының консультациялық қолдауымен іске асырылуда және адами ресурстарды басқару жүйесін нығайтуға, сондай-ақ энергетикадағы технологиялық өзгерістер жағдайында қызметкерлердің кәсіби дағдыларын дамытуға бағытталған.
Жоба менеджері Дина Жақыпбаева энергетика саласын жаңғырту тек технологияларды жаңартуды ғана емес, сонымен қатар адами капиталды жүйелі түрде дамытуды талап ететінін атап өтті.
– Бүгінде энергетика саласы елеулі өзгерістер кезеңін бастан өткеруде. Жабдықтарды жаңғырту және жаңа технологияларды енгізумен қатар, қызметкерлердің құзыреттерін дамыту ерекше маңызға ие. Қызметкерлер кәсіби дағдыларын үнемі жетілдіріп, жаңа технологиялық ортада сенімді жұмыс істей алатындай жағдай жасау маңызды, – деп атап өтті ол.
Жобаның негізгі бағыттарының бірі – неғұрлым инклюзивті жұмыс ортасын қалыптастыруға, әйелдердің техникалық және басқарушылық мамандықтарға қатысуын кеңейтуге және қызметкерлердің кәсіби өсуі үшін тең мүмкіндіктерді дамытуға бағытталған Гендерлік іс-қимыл жоспарын әзірлеу болмақ.
– Мұндай жобалар неғұрлым тұрақты және заманауи корпоративтік мәдениетті қалыптастыруға ықпал етеді. Кәсіби ортада тең мүмкіндіктер жасау мықты әрі тиімді командаларды қалыптастыруға септігін тигізеді. Гендерлік іс-қимыл жоспары инженерлік және техникалық мамандықтардағы әйелдерді қолдау мен дамытуға арналған практикалық құралдарды енгізуге мүмкіндік береді, – деп есептейді гендерлік мәселелер жөніндегі сарапшы Әлия Ілиясова.
Жоба аясында энергетикадағы технологиялық өзгерістерге мамандарды даярлауға ерекше назар аударылады. Әңгіме заманауи энергетикалық мамандықтың маңызды бөлігіне айналып отырған цифрлық және «жасыл» дағдыларды дамыту туралы болып отыр.
Сондай-ақ бастама шеңберінде қолданыстағы кадрлық тәжірибелер мен жаңа құзыреттерге деген қажеттіліктерге талдау жүргізіледі. Жас мамандарды даярлау және кәсіби оқыту жүйесін дамыту мақсатында білім беру ұйымдарымен және салалық серіктестермен ынтымақтастықты кеңейту жоспарлануда.
Жобаны іске асыру «АлЭС» АҚ-ның кадрлық әлеуетін дамытудың тұрақты жүйесін қалыптастыруға мүмкіндік береді, ол энергетика саласының заманауи талаптарына және оның одан әрі стратегиялық даму міндеттеріне сәйкес келеді.