АлЭС: Қапшағай су қоймасының өмірін бірге сақтаймыз
«АлЭС» АҚ қызметкерлері Қапшағай су қоймасына 3 500 тұқы шабағын жіберді
Күздің ортасында Қапшағай су қоймасына әрқайсысының салмағы кемінде 20 грамм болатын 3 500 тұқы шабағы жіберілді. «АлЭС» АҚ үшін бұл жай ғана экологиялық акция емес, бұл – табиғатты сақтау мен болашақ ұрпақты қолдауға қосқан үлес.
Станция қызметкерлерінің қолында – су айдынының болашақ иелері, тірі күмістей жылтыраған шабақтар салынған мұқият дайындалған ыдыстар бар. Бірнеше сәттен кейін су беті жеңіл шолпылмен толып, мыңдаған тұқы шабақтары үлкен өмір жолына аттанады.
«АлЭС» қызметкерлері үшін бұл жай ғана жұмыс барысындағы шара емес. Көбісі табиғаттың үлкен үдерісінің бір бөлшегіне айналғандай сезімде болғандарын жасырмайды. Кішкентай балықтармен бірге суға болашаққа деген қамқорлық та кетіп жатқандай – Қапшағай су қоймасы келер ұрпақ үшін тірі, мол, әрі бай болып қала беретініне деген сенім бар.
Су айдынын балықтандыру соңғы жылдары игі дәстүрге айналды. 2023 жылы мұнда 3 232 тұқы шабағы жіберілген еді. Ал биыл – 3 500. Әрбір жаңа шабақ партиясы – балық санын қалпына келтіруге, судың тазалығына және экожүйенің саулығына деген үміт.
Елдегі ең көне шаруашылықтардың бірі – Шелек тоған шаруашылығының қызметкерлері балықты жеткізіп, оның жай-күйін бақылап отырды. Олар үшін бұл үйреншікті іс болғанымен, аса жауапты жұмыс: өйткені әрбір жіберілген балық – табиғатты сақтау жолындағы ортақ іске қосылған үлес екенін жақсы біледі.
Процесс Капшағай балық инспекциясы бөлімінің басшысы, Алматы облысының табиғи ресурстар және табиғат пайдалануды реттеу басқармасының өкілдері, «Halyk Balyk» ЖШС мердігер ұйымының өкілдері, «Балық шаруашылығы ғылыми-өндірістік орталығы» ЖШС ғылыми қызметкері және «АлЭС» АҚ қызметкерлерінен құралған комиссияның бақылауымен өтті. Барлық қатысушылар үшін бұл жай ғана формалды бақылау емес, су айдынына пайдасы тиетінін және барлық әрекеттердің дұрыс орындалғанын қамтамасыз етудегі ортақ миссия болды.
– Біз балық санының артуын ғана емес, су сапасының жақсаруын, экожүйенің нығаюын да күтеміз. Мұндай акциялар биологиялық әртүрлілікті сақтауға көмектеседі және адам мен табиғат одақтас болуы керек екенін еске салады, – деп бөлісті «АлЭС» АҚ Қоршаған ортаны қорғау басқармасының бас маманы Мейрамбек Көбеев.
Биоәртүрлілікті сақтау – «АлЭС» АҚ саналы және жүйелі түрде жауапкершілікті арқалайтын міндет. Өйткені энергетика – бұл тек жылу мен жарық қана емес, сонымен қатар біз біртұтас өмір сүретін табиғатқа деген қамқорлық.